மலம் -கடிதங்கள்

 

அன்புள்ள ஜெயமோகன் அவர்களுக்கு,

 

தங்களின் மலம் என்ற பெயரில் வந்த கண்டனத்தை படித்தேன். தங்கள் கருத்துக்களைப் படித்து வருபவன். ஆசாரம் குறித்து எழுதியவரின் கருத்துக்களையும் படித்து வருபவன். சாதி குலம் சார்ந்து அவர் கருத்துக்களுடன் ஒத்துப் போக வேண்டிய கட்டாயம் எனக்கு இல்லை. என் புரிதலில் அவர் சாதி சார்ந்தோ சாதியத்திற்காகவோ அவ்வாறு எழுதவில்லை.

 

நீங்களே பல வசைகளுக்குச் சொல்லும் பதில் – உங்கள் எழுத்துக்களைத் தொடர்ந்து வாசிக்க வேண்டும் என்றும் அத்தகைய வாசகர்களுக்கே எழுதுவதாகவும், ஏதோ ஒரு கட்டுரையையோ ஒரு பத்தியையோ மட்டும் எடுத்துக் கொண்டு திரிப்பது சிந்திக்க மறுக்கும் வெற்று எதிர்வாதம். அது திரு தேசிகனின் எழுத்துக்கும் பொருந்துமல்லவா.

 

குறை மாவு நிறை கொழுப்பு (LCHF / Paleo) உணவு முறை பற்றி எழுதும்போது அந்தக் கருத்து எழுதப்பட்டது. பேலியோ முறையில் செக்கு எண்ணெய் கொண்டு வீட்டில் சமைத்த உணவிற்கே அதிக முக்கியத்துவம் கொடுக்கப்படுகிறது. சைவம் அசைவம் இரண்டிற்கும் பொருந்தும். தேசிகன் அது குறித்து ஒரு தொடரையும், மருத்துவருடன் இணைந்து ஒரு வார இதழில் எழுதியுள்ளார். அதில் சைவ அசைவ உணவு பரிந்துரைகள் உள்ளன. இந்தப் பின்னணியில் நாம் அவர் ஆசாரம் குறித்த கருத்துக்களைச் சரியாகப் புரிந்து கொள்ளலாம். மேலும் நீங்கள் முன்வைப்பது போலப் பழைய கருத்துக்களைக் காலத்திற்கு ஏற்ப புதிய கோணத்தில் சிந்திப்பதில் தவறு இல்லை அல்லவா.

 

அதே சமயம் தேசிகன் அவர்களின் கட்டுரையும் சற்று அவசரத்தில் எழுதப்பட்டதாக உள்ளது. சில சொல்லாட்சிகள் கவனமாகக் கையாளப்பட்டிருக்கலாம். அவருடைய மற்ற பதிவுகளைப் படிக்கும்பொழுது நிச்சயம் சாதியம் மேட்டிமைவாதம் ஆகியவற்றிற்கு எதிராகவே உள்ளார். நீங்கள் கூறுவது போல் அவர் தூய்மைவாதம் தீண்டாமை என்ற உட்பொருள் கொண்டு எழுதவில்லை. அவர் நோக்கில் உடுப்பியில் உள்ள உடுப்பி ஓட்டலில் உண்பதும் ஆச்சாரம் அற்றதே.

 

-ஆனந்த்

 

 

ஜெமோ,
Belated birthday wishes. இப்பல்லாம், wife பிறந்த நாளை ஞாபகப்படுத்தவே Facebook தேவைப்படுது. சமீபகாலமாக தங்களை நெருங்கிக் கொணடிருக்கும் எனக்கு உங்களின் இப்பிறந்த நாள் நினைவிலில்லை. நீங்கள் ஒரு cusp. எங்கோ படித்த ஞாபகம், “Cusps are very unique personalities” என்று. உங்களுக்கு, அது மிகச்சரியாக பொருந்துவதாக நினைக்கிறேன். போதும் முகஸ்துதி என்கிறீர்களா!!! சரி விஷயத்திற்கு வருகிறேன்.

“மலம்” பதிவு தான் இக்கடிதத்தை எழுதத் தூண்டியது. உயர்தத்துவங்களான, துவைதம், அத்வைதம் மற்றும் விஷிஸ்டாத்வைதத்தை தங்களின் “இந்து ஞான மரபில் ஆறு தரிசனங்கள்” வழியாக அறிந்து, அவற்றை தனதாக்கி கொண்டவர்கள் செய்யும் செய்த காரியங்களுடன் பொருத்திப் பார்த்து, இங்கே தொகுத்துக் கொணடிருக்கிறேன்.

இத்தத்துவங்களை தனதாக்கி கொண்டவர்கள் செய்யும் காரியங்கள், நீங்கள் சொல்வதைப்போல அவர்களுடைய மேட்டிமைவாதத்தை நிறுவிக் கொள்வதற்காகத்தான். சிலருக்கு அது வெறும் வயிற்றுப் பிழைப்புக்கானவை எனறும் எண்ணுகிறேன். அத்தத்துவங்களை சிருஸ்டித்தவர்களை , இவர்கள் இழிவுதான் படுத்துகிறார்கள்.

இவர்களுக்கு இந்து மதத்தை வெறும் சடங்குகளாகவும் (ராமானுஜரின் விஷிஸ்டாத்வைதம்) ஆச்சாரமாகவும் ( மத்துவாச்சாரியாரின் துவைதம்) மட்டுமே தெரியும்.

துவைதத்தை வைத்து, விஷமத்தனமாக ஜீவாத்மாவும் பரமாத்மாவும் வெவ்வேறு என்று எளியவர்களை ஒதுக்கினார்கள். ராமானுஜரை வைத்து, எளியவர்கள் பரமாத்மாவை சடங்குகள் மூலம் அடையலாம் என்று ஆசை காட்டினார்கள்.

ஆதிசங்கரரின் அத்வைதம், ஜீவாத்மாவும் பரமாத்மாவும் வெவ்வேறல்ல என்கிறது. நீயும் கடவுளும் ஒன்றே என்கிறது. “அகம் பிரம்மாஸ்மி”.  என்ன காரணம் என்று தெரியவில்லை, இவரை மட்டும் நாத்திகவாதி என்று ஒதுக்காமல் கோயிலுக்குள் வைத்துக் கொண்டார்கள்.

அன்புடன்
முத்து

 

ஜெ

///காஞ்சி சங்கராச்சாரியாரின் எழுத்துக்களைப்பார்த்தால் அவர் அத்தனை மாற்றங்களையும் ஆசாரத்தின் பெயரால் எதிர்ப்பதைக் காணலாம். மற்ற மடாதிபதிகள் அதிகம் எழுதியதில்லை, எழுதியிருந்தால் அவர்களும் அதைத்தான் சொல்லியிருப்பார்கள்.///

 

குன்றக்குடி அடிகளார் (அருணாசல தேசிக பரமாச்சாரிய சுவாமிகள்) அப்படிப்பட்டவர் அல்லர்.

 

http://www.tamilvu.org/library/nationalized/html/naauthor-16.htm

http://www.tamilvu.org/library/nationalized/pdf/16-kundrakudiadigalar/vazakainalam.pdf

 

 

• தேமொழி

 

 

அன்புள்ள ஜெயமோகன்!

 

ஆசாரத்தினால் ஆட்டிவைக்கப்படும் மனிதன் எப்படி முழுமூடனாக மாறுகிறான், என்பதற்கு என் வாழ்விலே ஒருவரை சந்தித்துள்ளேன்.

 

தண்ணீரில் மலம் கழிக்கக் கூடாது என்பது ஆசாரம், நியதி. இது நீர்நிலைகளை அசுத்தமாக்குவதைத் தடுக்க ஏற்பட்ட ஒரு கட்டுப்பாடு என்பது குழந்தைக்கும் புரியும்.

 

என்னுடன் பணி புரிந்த ஒருவர் வீடுகட்டினார். வீட்டின் முழு அளவே 450 சதுர அடிதான்.இக்கால வழக்கப்படி ‘செப்டிக் டான்க்’ கழிவறை வைத்து வீடுகட்டப்பட்டது.

 

வீட்டினில் குடியேறிய பின்னரே ஆசாமிக்கு ‘செப்டிக் டாங்க்’ கழிவறையில் தான் தண்ணிரில்  மலம் கழிக்க வேண்டும் என்பது புரிந்தது. பதறிவிட்டார்.அந்தக் கழிவறையிலேயே வெளியில் மலம் கழித்துவைத்தார்.நாற்றம் தாங்காமல் மனைவி ஒரு சில நாட்களில் பிரிந்து சென்றார். கதவைத் தாழிட்டுக் கொண்டு யாரோடும் தொடர்பில்லாமல் நாற்றத்திலேயே காலத்தைக் கழித்தார் அந்த ஆசார சீலர்!

 

அனபுடன்

கே.முத்துராமகிருஷ்ணன்.