விஷ்ணுபுரம் விருது

விஷ்ணுபுரம் விருந்தினர்கள் இதுவரை

December 16, 2023

விஷ்ணுபுரம் சிறப்பு விருந்தினர்கள் 2010 ஆம் ஆண்டு முதல் பங்கெடுத்து வருகிறார்கள். தொடக்க காலத்தில் நிதி மிகமிகக்குறைவாக இருந்தமையால் சொந்தச்செலவில் வந்து செல்பவர்களையே அழைத்தோம். திரைப்படத்துறை ஆளுமைகள் என் மேல் கொண்ட மதிப்பால் அவ்வாறு கலந்துகொண்டனர். இளையராஜாவின் வருகைக்குக் கூட நாங்கள் ஒரு பைசா செலவிடவில்லை என்று சொன்னால் பலர் நம்ப மாட்டார்கள். மணிரத்னம் , இளையராஜா, வெற்றிமாறன், நாசர், வசந்த், வசந்தபாலன், பாரதிராஜா, பாலா உள்ளிட்ட திரை ஆளுமைகளுக்கு அவ்வகையில் மிகவும் நன்றிக்கடன் பட்டிருக்கிறோம்.

புகழ்மிக்க விருந்தினர் ஏன் தேவை என நினைத்தோம் என்றால் இவ்விருதின் மதிப்பு ஊடகங்களுக்கும் விருதுபெறுபவர்களின் குடும்பத்தினருக்கும் தெரியவேண்டும் என்பதற்காகத்தான். அது நிகழ்ந்து இவ்விருது தன்னளவிலேயே முக்கியமானதாக ஆனபின் இந்திய அளவில் அறியப்பட்ட, அறியப்படவேண்டிய இலக்கிய ஆளுமைகளை அழைக்கலானோம். இவ்வாண்டுமுதல் உலக அளவில் எழுத்தாளர்களை அழைக்க தொடங்கியுள்ளோம்.

நாங்கள் வெறுமே விருந்தினர்களை அழைப்பதில்லை. அவர்களை விரிவாக அறிமுகம் செய்கிறோம். அவர்களின் படைப்புகளை மொழியாக்கம் செய்து வெளியிடுகிறோம். அவை பின்னர் நூல்களாக வெளிவந்துள்ளன. ஜெனிஸ் பரியத், மமங்தாய், கே.ஜி.சங்கரப்பிள்ளை, கல்பற்றா நாராயணன், சின்னவீரபத்ருடு, அனிதா அக்னிஹோத்ரி, மதுபால், ஜான்னவி பருவா, எச்.எஸ்.சிவப்பிரகாஷ் போன்றவர்களின் படைப்புகளை தமிழில் கொண்டுவந்தோம். இந்த தளத்திலேயே அவற்றைப் படிக்கலாம். ஆகவே அவர்களுடனான விவாதங்களும் சிறப்பாக அமைந்தன.

இவ்வாண்டு எஸ்.எம்.ஷாகீர், ராமச்சந்திர குகா ஆகியோர் கலந்துகொள்கிறார்கள்.