யோகம், வகுப்புகள், கடிதங்கள்

யோகம், தியானம் முதலிய பயிற்சிகளில் நாங்கள் பங்கேற்பவர்களுக்கும் ஆசிரியர்களுக்குமான நேரடி உறவையும் முக்கியமாக நினைப்பதனால் 30 பேர் வரைக்குமே அனுமதிக்கிறோம். இடங்கள் பெரும்பாலும் இரண்டு நாட்களில் நிறைந்துவிடுகின்றன.ஆகவே அறிவிப்பைக் கண்டதுமே இடம் முன்னரே பதிவுசெய்வது அவசியம்.

ஜெ

அன்புள்ள ஜெ,

நீங்கள் அளிக்கும் பயிற்சிகளில் கர்நாடக இசை, இந்துஸ்தானி இசை கேட்பதற்கான பயிற்சியை ஏன் அளிக்கக்கூடாது? இந்திய கலைகளை ரசிப்பதை கற்றுக்கொள்வதுதான் கடினமாக உள்ளது. கதகளி ரசிப்பதற்கான பயிற்சியையும் அளிக்கலாம்.

நா. முருகேசன்

*

அன்புள்ள முருகேசன்,

அப்படி பல பயிற்சிகளை அளிக்கலாம். இசை சார்ந்த அறிமுகம் என்பது தொடர்ச்சியாக சில அரங்குகள் வழியாகவே நிகழ முடியும். ஆர்வமுள்ளவர் எவ்வளவுபேர் இருப்பார்கள் என தெரியவில்லை. சரியான ஆசிரியர்களையும் கண்டடையவேண்டும்.

முக்கியமாக சிலவற்றை அறிமுகம் செய்யலாமென நினைக்கிறேன். ஒன்று, ஆயுர்வேதம். ஆயுர்வேதம் என்றால் என்ன, மரபான நாட்டுமருத்துவத்திற்கும் அதற்கும் உள்ள வேறுபாடு என்ன, அது எதை குணப்படுத்தும் எதை குணப்படுத்தாது, எதுவரை நம்பலாம் என பொதுவாக மக்களுக்கு தெரிவதில்லை. அதற்கு ஒரு வகுப்பு நடத்த எண்ணமுண்டு.

நம் மக்களுக்கு இந்தியச் சட்டங்கள் பற்றிய அறிவே இல்லை. திரைப்படங்கள் உள்ளிட்ட கலைவடிவங்களில் காட்டப்படும் சட்டநடவடிக்கைகள் மிகப்பிழையானவை. ஒரு சாமானியக் குடிமகனுக்கு தேவையான சிவில் கிரிமினல் சட்டங்களை எளிமையாக அறிமுகம் செய்யலாமென்று தோன்றுகிறது. இது சிந்திப்பவர் அனைவருக்கும் உதவுவது.

இரண்டுக்கும் ஆசிரியர்கள் இருப்பதனால் வகுப்புகளை அமைக்கலாமென்பது திட்டம்

ஜெ

*