இந்த நூல் இயல்பாக என் இணையதளத்தில் உருவாகி வந்த விவாதங்களில் இருந்து திரட்டப்பட்டது. ஒருபாலுறவினரான விஜய் என்னும் நண்பர் எழுதிய கடிதத்தில் இருந்து இந்த உரையாடல் தொடங்கியது. நான் நண்பர்களின் நம்பிக்கைக்குரியவன் என்பதனால் இத்தகைய தனிப்பட்ட கடிதங்கள் நிறையவே வருவதுண்டு.
இக்கடிதங்கள் தமிழ்ச்சூழலிலேயே ஒருபாலுறவு ஈர்ப்பு கொண்டவர்கள் பலர் இருப்பதும், இங்குள்ள சமூகநோக்கு அவர்களை ஒரு தலைமறைவுச் சமூகமாக ஆக்கியிருப்பதும் தெரிந்தது. இந்த விவாதங்களில் பல தளங்களில் இருந்து குரல்கள் எழுந்து வந்தன. அவற்றை தொகுத்திருக்கிறோம்
என்னுடைய பார்வை எப்போதுமே தெளிவானது.நான் பாலியல், ஒழுக்கவியல் கொண்டு மனிதர்களை அளவிடுவதில்லை. சமூகப்பங்களிப்பைக் கொண்டே அளவிடுகிறேன். ஒருவர் தன் வாழ்க்கையை அர்த்தப்படுத்திக்கொள்வது அப்பங்களிப்பின் வழியாகவே. அதை இயற்றுவதற்குரிய வாழ்க்கையை அவர் அமைத்துக்கொண்டார் என்றால் அதுவே உகந்த வாழ்க்கை.
இந்நூல் தன்பாலுறவினருக்கு மட்டுமல்ல அவர்களை அறியவிழைபவர்களுக்கும் உகந்ததாக இருக்குமென நினைக்கிறேன். தமிழின் தலைசிறந்த மொழிபெயர்ப்பாளர்களில் ஒருவரான அனிருத்தன் வாசுதேவன் தன்னை தன்பாலுறவினராக பொதுவெளியில் அறிவிப்பவர். அவருக்கு இந்நூல் சமர்ப்பணம்
ஜெ
ஓரினச்சேர்க்கை – அனிருத்தன் வாசுதேவன்
***
