அன்புள்ள ஜெ
என் நண்பர் ஒருவர் ஒரு டிவீட்டை எனக்கு காட்டினார். அதில் நா.மம்முது அவர்களின் ஒரு பேட்டியை ahI Maz என்பவர் சுட்டி கொடுத்து இப்படி எழுதியிருந்தார். jeyamohan to his sanghi readers: ‘christians in tamil nadu have not contributed anything to tamil culture’ not that it should be a prerequisite for the minorities to have contributed to a ‘culture’ for them to be seen as ‘bonafide’, but the contribution of tamil christians & tamil muslims to tamil language/society is immense.
நான் உங்கள் தளத்திற்கு புதியவன். இப்படி நீங்கள் சொல்லியிருக்கிறீர்களா என்று சந்தேகப்பட்டு நான் உங்கள் தளத்தில் தேடினேன். ஆச்சரியமாக தமிழில் கிறிஸ்தவ, இஸ்லாமிய இலக்கியம் சார்ந்து மிக அதிகமான தகவல்கள் அளிப்பது உங்கள் தளம்தான். ஏராளமான கட்டுரைகள், குறிப்புகள். வெளியே மதம் சார்ந்த அமைப்புகளில்கூட போதுமான அளவுக்குச் செய்திகள் இல்லை. தமிழில் வேறெந்த நவீன எழுத்தாளரும் இந்த அளவுக்கு அரிதான நூல்களை எல்லாம் அறிமுகம் செய்து எழுதியதுமில்லை.
மம்முது அவர்கள் தஞ்சை ஆபிரகாம் பண்டிதர் பற்றி பேசுகிறார். மம்முதுவை முதலில் அறிமுகம் செய்து, அட்டைப்படத்தில் போட்டு, ஆபிரகாம்பண்டிதர் பற்றிய விரிவான பேட்டியை வெளியிட்டதே நீங்கள் நடத்திய சொல்புதிது இதழ்தான். அந்த இதழே ஆபிரகாம் பண்டிதருக்கு தயாரிக்கப்பட்டது.
அப்படியென்றால் இவர்கள் ஏன் இப்பிரச்சாரத்தை முன்னெடுக்கிறார்கள். அதுவும் போலி ஐடியில்? நான் இணையத்தில் தேடினால் இப்படி ஒரு நூறு ஐடிக்களாவது வெறியுடன் பொய்யைச் சொல்லிக்கொண்டிருக்கிறார்கள். தமிழில் இந்த அளவுக்கு எந்த எழுத்தாளரும் பொய்ப்பிரச்சாரத்திற்கு ஆளானதில்லை என நினைக்கிறேன்
சக்தி குமார்
***
அன்புள்ள சக்தி,
இது எல்லா தரப்பிலும் நடக்கிறது. இஸ்லாமிய, கிறிஸ்தவ தரப்புகளில் எந்த வாசிப்பும் இல்லாமல் செவிவழிச்செய்தியாலேயே ஒரு காழ்ப்பை உருவாக்கிக்கொண்டு அதைக் கொட்டுகிறார்கள். திமுகவினர், கம்யூனிஸ்டுகள் மட்டுமல்ல அதே அளவுக்கு இந்துத்துவர்களும், பிராமணர்களும் காழ்ப்பையும் திரிப்பையும் கொட்டுவதைக் காணலாம். அத்தனை பேருக்கும் ஒரே பதில், எல்லாமே இணையத்தில் கைதொடும் இடத்தில் உள்ளது, படித்துப் பாருங்கள் என்பதுதான்.
ஆனால் மிகப்பெரும்பாலானவர்கள் படிக்கமாட்டார்கள். தங்கள் காழ்ப்புகளை தக்கவைத்துக்கொள்ளவே முயல்வார்கள். ஏனென்றால் இங்கே பெரும்பாலானவர்களின் அரசியல்-அறிவுத்தள நம்பிக்கைகள் அவர்களின் சாதி, மதம் சார்ந்தவை. அனேகமாக பத்துவயதுக்குள் அவை முடிவாகிவிடுகின்றன. அதன்பின் அதில் எந்த வளர்ச்சியும் இருப்பதில்லை – காழ்ப்புகள் மட்டும் திரட்டிக்கொள்ளப்படும்.
நான் பேசிக்கொண்டிருப்பது இவர்களிடம் அல்ல, தன் ரசனை அறிவுத்தரப்பு ஆகியவற்றை சொந்த தேடலால் உருவாக்கிக்கொள்ளும் மிகச்சிறுபான்மையினரான சிலரிடம். அவர்களின் நிலைபாடுகள் அவர்களின் பிறப்பால் தீர்மானிக்கப்பட்டவை அல்ல.
ஜெ
***
